Айлчлалын хүрээнд Пап Францис оролцсон талархал магтаалын мөргөл “Мөсөн өргөө” цогцолборт болсон юм

Densmaa 2023-09-04 01:09

Нийгэм

"Шашин шүтлэгийн янз бүрийн уламжлалууд хамтдаа зэрэгцэн оршиж байсан өнө эртний агуу их түүхтэй Монголын ард түмэн хамтдаа байж, бие биеэ илүү их таньж мэдэх боломжийг бидэнд олгож байна"

       Монгол Улсын Ерөнхийлөгч Ухнаагийн Хүрэлсүхийн урилгаар айлчилж буй Гэгээн Ширээт Улсын Төрийн тэргүүн Пап Францис манай улсад айлчиллаа. Айлчлалын хүрээнд Пап Францис оролцсон талархал магтаалын мөргөл “Мөсөн өргөө” цогцолборт болсон юм. Уг мөргөлд Пап Францисаас гадна католик шашны хамба, санваартан, гэлэнмаа нар болон сүсэгтнүүд оролцов. Тодруулбал, монголчууд төдийгүй БНХАУ, ОХУ, БНСУ, Казахстан зэрэг орноос ирсэн нийт 3000 гаруй мөргөлч оролцсон байна.  Манай улсын хувьд нийт 1500 орчим католик шашинт иргэдтэй. Түүнчлэн нийт 9 сүм үйл ажиллагаа явуулдгаас зургаа нь Улаанбаатар хотод, гурав нь Эрдэнэт, Дархан, Арвайхээр хотод байдаг. Монгол дахь католик шашны гол сүм бол Гэгээн Петр, Паулын цогчин дуган юм. Гэгээн Ширээт Улсын Төрийн тэргүүн Пап Францис сүсэгтэн олонтой уулзаж айлдахдаа “Хүн төрөлхтөн нэг л харьяалалтай. Товчхондоо эрэл мөргөлчид бид бүгдээрээ энэ дэлхий дээрх аяллынхаа зүг чиг, зам мөр олохын тулд алсыг харж явах ёстойг Монгол Улс бидэнд сануулж байдаг. Энэхүү чухал уулзалтын цаг мөчид миний бие та бүгдтэй хамт байгаадаа баяртай байна. Бид бүгд нэгэн дээвэр дор цугларсан нь өөрөө нэгийг өгүүлж байна. Шашин шүтлэгийн янз бүрийн уламжлалууд нь өөр өөрийн гарал үүсэл, өвөрмөц онцлогоороо дамжуулан нийгмийн төлөөх сайн сайхны гайхалтай нөөц бололцоог бүрдүүлж байдаг. Шашин шүтлэгийн янз бүрийн уламжлалууд хамтдаа зэрэгцэн оршиж байсан өнө эртний агуу их түүхтэй Монголын ард түмэн хамтдаа байж, бие биеэ илүү их таньж мэдэх боломжийг бидэнд олгож байна” гэсний зэрэгцээ эртний эзэнт гүрэн Хархорум хотод өөр өөр шашин шүтлэгтэй мөргөлийн газрууд зэрэгцэн оршиж байсан болохыг тодотголоо.