Хотын дарга С.Батболд Вьетнам Улсаас Монгол Улсад суугаа Элчин сайд Доан Тхи Хыөнг хүлээн авч уулзав
Монгол Улс, Вьетнам Улс хооронд дипломат харилцаа тогтоосны 63 жилийн ой энэ жил тохиож байна.
Нийслэлийн Засаг дарга бөгөөд Улаанбаатар хотын Захирагч С.Батболд Бүгд Найрамдах Социалист Вьетнам Улсаас Монгол Улсад суугаа Элчин сайд Доан Тхи Хыөнгийг хүлээн авч уулзлаа. Уулзалтын эхэнд Монгол Улс, Вьетнам Улс хооронд дипломат харилцаа тогтоосны 63 жилийн ой энэ жил тохиож байгаатай холбогдуулан хоёр улсын харилцаа, хамтын ажиллагаа хөгжин бэхжиж байгаад хотын дарга талархал илэрхийлжээ. Улаанбаатар хот Вьетнам Улсын Ханой, Хо Ши Мин хоттой харилцаатай ч сүүлийн жилүүдэд хамтын ажиллагаа идэвхтэй бус байгааг хотын дарга дурдаад “Хоёр улсын харилцааг хөгжүүлэхэд хотуудын харилцаа, хамтын ажиллагаа чухал ач холбогдолтой. Харилцан ашигтай хамтын ажиллагааг өргөтгөн хөгжүүлэхэд Элчин сайдын зүгээс дэмжиж ажиллахыг хүсчээ. Монгол Улсын ард түмэн манай улсыг хүнд хэцүү цагт маш их тусалж, дэмжиж байсан. Манай ард түмэн үүнийг хэзээ ч мартдаггүй” гэдгийг Элчин сайд Доан Тхи Хыөнг онцолжээ. Мөн тэрбээр “Сүүлийн үед хоёр орны хооронд аялал жуулчлал хөгжих хандлагатай байгаа. Энэ салбарыг цаашдаа илүү хөгжүүлэх боломжтой. Элчин сайдаар ажиллах хугацаандаа худалдааны салбарыг хөгжүүлэхийн тулд хичээн ажиллах болно. Цаашид хоёр орны харилцаа өргөжин тэлнэ гэдэгт итгэлтэй байгаагаа илэрхийлсэн байна. Улаанбаатар хот 1982 онд Ханой хоттой анх харилцаа тогтоон 1998 онд “Улаанбаатар хот, Ханой хот хоорондын найрсаг харилцаа, хамтын ажиллагааны тухай Санамж бичиг” байгуулж байжээ.
Үзсэн: 1356
Tweet