АНУ-аас Монгол Улсад суугаа Элчин сайд Ричард Буанган-ыг хүлээн авч уулзав
АНУ-ын хөрөнгө оруулалтыг нэмэгдүүлэх боломж бололцоо, Монгол-Америкийн хооронд шууд нислэгтэй болох эрх зүйн орчныг бүрдүүлэх зэрэг асуудлаар санал солилцов
Гадаад харилцааны сайд Б.Батцэцэг АНУ-аас Монгол Улсад суугаа Элчин сайд Ричард Буанган-ыг үүрэгт ажилдаа орсонтой нь холбогдуулан хүлээн авч уулзав. Гадаад харилцааны сайд Б.Батцэцэг уулзалтын эхэнд Монгол Улс чухал гуравдагч хөрш, дотны түнш АНУ-тай хөгжүүлж буй харилцаандаа өндөр ач холбогдол өгдөг гээд хоёр талын харилцаа, хамтын ажиллагааг цаашид Стратегийн түншлэлийн үзэл санааны дагуу бүхий л салбарт өргөжүүлэхийн төлөө байгаагаа онцлов. Элчин сайдын зүгээс ардчиллын нийтлэг үнэт зүйлсэд тулгуурласан хоёр улсын харилцаа, хамтын ажиллагааг улам бүр гүнзгийрүүлэн хөгжүүлэх, тэр дундаа эдийн засгийн хамтын ажиллагааг идэвхжүүлэх, боловсрол, соёл, иргэд хоорондын хэлхээ холбоог нэмэгдүүлэхэд онцгой ач холбогдол өгч ажиллахаа тэмдэглэв. Талууд 2022 онд Монгол Улс, АНУ-ын хооронд дипломат харилцаа тогтоосны 35 жилийн ой тохиож байгааг тэмдэглээд, цаашид, дээд, өндөр түвшний яриа хэлэлцээг үргэлжлүүлэх, хоёр талын худалдаа, АНУ-ын хөрөнгө оруулалтыг нэмэгдүүлэх боломж бололцоо, Монгол-Америкийн хооронд шууд нислэгтэй болох эрх зүйн орчныг бүрдүүлэх зэрэг асуудлаар санал солилцов.
Үзсэн: 490
Tweet