Франц дахь Монголын элчин сайдын яамнаа зочлов
Монгол Улстай харилцах харилцаа, хамтын ажиллагааг цаашид улам өргөжүүлэн хөгжүүлэх сонирхолтой байгаагаа илэрхийлэв
Монгол Улсаас Бүгд Найрамдах Франц Улсад суугаа Элчин сайд У.Нямхүүгийн урилгаар Францын парламентын доод танхим-Үндэсний Ассамблей дахь Франц-Монголын найрамдлын бүлгийн дарга ноён Антони Булонь тэргүүтэй гишүүд Элчин сайдын яамнаа зочлов. Талууд хоёр улсын улс төр, нийгэм, эдийн засгийн өнөөгийн нөхцөл байдал, боловсролын тогтолцоо, орон нутгийн хөгжил, хот төлөвлөлт, тогтвортой хөгжлийн бодлого зэрэг өргөн хүрээний асуудлаар харилцан мэдээлэл солилцож, Монгол, Францын хамтарсан төсөл, хөтөлбөрүүдийн хэрэгжилт, үр дүнгийн талаар ярилцав. Түүнчлэн боловсрол, соёл, залуучуудын солилцоо, орон нутгийн хамтын ажиллагааг өргөжүүлэхийн ач холбогдлыг онцлон тэмдэглэжээ. Элчин сайд У.Нямхүү Монгол, Францын харилцаа сүүлийн жилүүдэд идэвхтэй хөгжиж, дээд, өндөр түвшний айлчлал, хамтын ажиллагааны томоохон төсөл, иргэд хоорондын харилцаа улам өргөжин бэхжиж буйг тэмдэглэв. Мөн Францын парламент дахь Франц-Монголын найрамдлын бүлэг хоёр улсын харилцааг гүнзгийрүүлэх, харилцан ойлголцлыг нэмэгдүүлэхэд чухал хувь нэмэр оруулж ирснийг онцлон талархал илэрхийлэв. Ноён Антони Булонь болон найрамдлын бүлгийн гишүүд Монгол Улстай харилцах харилцаа, хамтын ажиллагааг цаашид улам өргөжүүлэн хөгжүүлэх сонирхолтой байгаагаа илэрхийлж, хоёр улсын хөгжил, дэвшлийн төлөө парламент хоорондын хамтын ажиллагааг идэвхтэй дэмжин ажиллахаа нотложээ.
Үзсэн: 681
Tweet