Монгол Улсын Ерөнхийлөгч У.Хүрэлсүх төрийн айлчлалынхаа хүрээнд Саксони муж улсад айлчиллаа
Төрийн айлчлалын хөтөлбөрт Саксони муж улсад онцгойлон айлчилж байгаа нь Монгол, Саксони муж улс нэгэн зууны түүхэн уламжлалтай болохыг онцлов
Монгол Улсын Ерөнхийлөгч У.Хүрэлсүх Холбооны Бүгд Найрамдах Герман Улсад хийж буй төрийн айлчлалынхаа хүрээнд Саксони муж улсад айлчилж байна. Ерөнхийлөгч У.Хүрэлсүхийг Лайпциг хотод хүрэлцэн ирэхэд Саксони муж улсын Засгийн газрын Хэрэг эрхлэх газрын дарга, Холбооны болон Европын асуудал эрхэлсэн Төрийн нарийн бичгийн дарга Андреас Хандшү тэргүүтэй төлөөлөгчид угтан авлаа. Ерөнхийлөгч У.Хүрэлсүх Холбооны Ерөнхийлөгчийн урилгаар хийж буй төрийн айлчлалын хөтөлбөрт Саксони муж улсад онцгойлон айлчилж байгаа нь Монгол, Саксони муж улс нэгэн зууны түүхэн уламжлалтай болохыг дурдав. Тухайлбал, 1926 онд манай их зохиолч Дашдоржийн Нацагдорж тэргүүтэй анхны 30 гаруй монгол залуу эрдэм сурахаар Герман Улсыг зорьж, манай шинэ үеийн сэхээтнүүд болон бэлтгэгдэж, орчин цагийн Монгол Улсыг цогцлоон хөгжүүлэхэд үнэтэй хувь нэмэр оруулсан түүхтэй. Уулзалтаар Ерөнхийлөгч У.Хүрэлсүх, муж улсын Засгийн газрын хэрэг эрхлэх газрын дарга А.Хандшү нар Монгол, Германы Стратегийн түншлэлийн харилцааг Холбооны түвшинд төдийгүй, муж улсуудтай хөгжүүлж буй бодит хамтын ажиллагаагаар баяжуулах нь чухал гэдгийг тэмдэглэв. Хоёр талын энэхүү түүхэн уламжлал өнөөг хүртэл үргэлжилж, эдүгээ 700 гаруй оюутан Германд суралцаж байгаа бөгөөд Монгол Улсын Ерөнхийлөгчийн санаачилсан “Илгээлт-2100” тэтгэлэгт хөтөлбөрийн хүрээнд 126 оюутан Дрездений Техникийн их сургуульд суралцаж байна. Мөн “Монгол ба монголын дараах үеийн Еврази дахь соёлын солилцоо, байгаль орчин” сэдэвт олон улсын эрдэм шинжилгээний хурлыг Хумбольдтын их сургуульд, их зохиолч Д.Нацагдоржийн мэндэлсний 120 жилийн ойд зориулсан эрдэм шинжилгээний олон улсын бага хурлыг Лайпцигийн их сургуульд тус тус зохион байгуулж байгааг сайшаан тэмдэглэв.
Үзсэн: 277
Tweet