Монгол, Казахстан улсууд биеийн тамир, спортын салбарт хамтран ажиллана
Монгол, Казахстаны Биеийн тамир, спортын газар хооронд хамтран ажиллах тухай харилцан ойлголцлын санамж бичигт талууд гарын үсэг зурав.
Монгол Улсын Засгийн газрын хэрэгжүүлэгч агентлаг Биеийн тамир, спортын газрын дарга Ц.Шаравжамц энэ оны 3 дугаар сарын 4-ны өдөр Бүгд Найрамдах Казахстан Улсын Соёл, спортын яамны Биеийн тамир, спортын хорооны дарга Серик Сапиевтай Астана хотноо уулзаж, хоёр талын биеийн тамир, спортын хамтын ажиллагааны харилцааг өргөжүүлэх асуудлаар санал солилцлоо. Биеийн тамир, спортын газрын дарга Ц.Шаравжамц түүхийн нийтлэг өв уламжлалтай, найрсаг харилцаа бүхий хоёр орны биеийн тамир, спортын газрын хооронд хамтын ажиллагааг хөгжүүлэх эрмэлзэлтэй байгааг илэрхийлээд спортын салбарт хамтран ажиллах ихээхэн боломж байгааг онцлов. Мөн тэрбээр Казахстан Улсын тамирчид өвлийн спортын төрлөөр амжилт гаргаж байгаа талаар дурьдаж, тус улсад өвлийн спортын төрлөөр хоёр орны баг тамирчдыг хамтарсан бэлтгэл сургуулилт хийх тал дээр дэмжлэг үзүүлэхийг хүсч байгаагаа илэрхийлж, Казахстан Улсын Соёл, спортын яамны Биеийн тамир, спортын хорооны дарга С.Сапиевыг тааламжтай цагтаа Монгол Улсад айлчлахыг урьсан байна.
Казахстан Улсын Соёл, спортын яамны Биеийн тамир, спортын хорооны дарга Серик Сапиев Монголын тамирчид тив дэлхийд өндөр чансаатай, тухайлбал жудо, бокс, буудлагын тамирчидтай хамтарсан бэлтгэл хийх, дасгалжуулагч хамтран бэлтгэх саналтай байгаагаа илэрхийллээ. Уулзалтын дараа Монгол, Казахстаны Биеийн тамир, спортын газар хооронд хамтран ажиллах тухай харилцан ойлголцлын санамж бичигт талууд гарын үсэг зурав.
Үзсэн: 1195
Tweet