Нэгдүгээрт, НҮБ-ын Цөлжилттэй тэмцэх тухай конвенц дахь газрын нөхөн сэргээлт, ган гачигтай тэмцэх зорилтуудыг хэрэгжүүлэхэд жил бүр 278 тэрбум ам.долларын санхүүжилтийн дутагдалтай тулгарч буйг тэмдэглэж, эл санхүүжилтийн хэрэгцээг нөхөхөд Монгол Улс тус конвенцын Талуудын 17 дугаар бага хурлыг даргалах хугацаандаа газрын нөхөн сэргээлттэй холбоотой хөрөнгө оруулалтыг татах чиглэлээр конвенцын Талууд болон түншүүдтэй хамтран ажиллахаа илэрхийлэв.

Хоёрдугаарт, Далайд гарцгүй хөгжиж буй орнуудын Дэд бүтцийн хөрөнгө оруулалтын санхүүжилтийн хэрэгсэл байгуулах асуудлаарх Ерөнхий нарийн бичгийн даргын тайлангийн үр дүнд тулгуурлан холбогдох оролцогч талуудыг тус ажлыг бодит үр дүнд хүргэхэд хамтран ажиллахыг уриалав.

Түүнчлэн Монгол Улсын Засгийн газраас санаачлан хэрэгжүүлж буй “Эрх чөлөөний дөрвөн зам”, “Дөрвөн чөлөөлөлтийн бодлого” нь Тогтвортой хөгжлийн 7, 9 болон 16 дугаар зорилгуудын хэрэгжилтэд гарах ахиц дэвшлийг хурдасгахад чухал ач холбогдолтой болохыг онцлон тэмдэглэж, эдийн засгийн чөлөөлөлт санаачилгын хүрээнд хувийн хэвшлийн хөрөнгө оруулалтыг хөгжлийн санхүүжилтийг хурдасгагч хэлбэрээр хэрэгжүүлж буй манай улсын бодлого, санаачилгын талаар танилцуулав.